kantsasar.com – Ազգ. Քարէն Եփփէ Ճեմարանի Միջնակարգի 2012-2013 ուսումնական տարեշրջանի շրջանաւարտ հունձքի ամավերջի հանդէսը եկաւ հաստատելու, որ երկրի անապահով պայմաններն ու կենցաղային բազում դժուարութիւնները յուսահատութեան չեն մատնած մեր առոյգ աշակերտներն ու Ազգ. Քարէն Եփփէ Ճեմարանի տնօրէնութիւնը:
Հանդէսը կազմակերպուած էր հովանաւորութեամբ Հալէպի կրթական տնօրէնութեան, նախագահութեամբ Բերիոյ Հայոց Թեմի Բարեջան Առաջնորդ Գերշ.Տէր Շահան Ս.Եպս. Սարգիսեանի, Կիրակի 9 Յունիս 2013-ին, կէսօրուայ ժամը 12.00-ին, «Գ.Եսայեան» սրահէն ներս: Ներկայ էին Ազգ. Վարչութեան, Պատկան Մարմնի, Ճեմարանի խնամակալութեան ներկայացուցիչները, Ճեմարանի տնօրէնն ու պետական տնօրէնը, ծնողներ եւ ուսուցիչներ:
Հանդէսին բեմ բարձրացան 129 աշակերտ-աշակերտուհիներ, որոնք հպարտ իրենց ուսումնական ձեռքբերումներով, կոկիկ յայտագիրով մը հրաժեշտ տուին միջնակարգի ուսումնական հանգրուանին, թեւակոխելու երկրորդականի եռամեակ:
Հանդիսութիւնը բացուեցաւ Հայաստանի Հանրապետութեան եւ Սուրիոյ օրհներգներով:
Հայերէն բացման խօսքով հանդէս եկաւ շրջանաւարտ Անի Մկրտիչեան, որ ըսաւ, թէ հակառակ երկրիս ծանր պայմաններուն եւ Ճեմարանը զինեալ բախումներու գօտիի մէջ յայտնուած ըլլալուն համար, տնօրէնութիւնը մեզ տեղափոխեց Ազգ. Կիւլպէնկեան վարժարան եւ մեր ուսումնական տարին իր լրումին հասցուցինք, յաղթահարելով բոլոր դըժուարութիւնները:
Արաբերէն լեզուով բացման խօսք ներկայացուց շրջանաւարտ Շաղիկ Գէորգ, որ շնորհակալութիւն յայտնեց Ճեմարանի տնօրէնութեան եւ ուսուցչական կազմին` դժնդակ այս տարին իր լրումին հասցնելու իրենց անսակարկ ճիգերուն համար:
Ապա ելոյթ ունեցաւ երգչախումբը` շրջանաւարտներէ բաղկացած, խմբավարութեամբ տիկ. Ալին Մոմճեանի, շրջանաւարտները ներկայացուցին հայերէն եւ արաբերէն երգեր:
Այնուհետեւ Անի Տրմաշ եւ Կարօ Գուզուեան, տպաւորիչ առոգանութեամբ ներկայացուցին արաբերէն լեզուով քերթուած մը` «Դամասկոսին նուիրուած քերթուած» խորագրով:
Արաբերէն լեզուով ուղերձ ներկայացուց շրջանաւարտ Շողեր Տողրամաճեան, ան շնորհակալութիւն յայտնեց բոլոր անոնց, որոնք կը սատարեն Սուրիական հայրենիքի պահպանման ու զարգացման, ինչպէս նաեւ յատուկ շնորհակալութիւն յայտնեց տնօրէնութեան, որ ճիգ չխնայեց ուսումնական այս տարին ամբողջացնելու, ինչպէս նաեւ ուսուցչական կազմին եւ դաստիարակներ` Ալին Պալիոզեան-Համամճեանին եւ Նայիրի Զաքոյեանին:
Խումբ մը շրջանաւարտներ ներկայացուցին «Մեր Մայրերը» խորագրով համադրուած ասմունք մը, նուիրուած Ն.Ս.Օ.Տ.Տ. Արամ Ա. Կաթողիկոսի կոնդակով յայտարարուած «Հայ Մօր Տարուան»:
Հայերէն լեզուով ուղերձ ներկայացուց շրջանաւարտ Ալիք Սարեան, որ ըսաւ. «Երկիւղածութեամբ կը բարձրանամ ինծի համար տաճար դարձած Ազգ. Քարէն Եփփէ Ճեմարանի հանդէսի այս բեմը: Բեմ մը, որ տարիներ շարունակ սերունդներ կերտած է հայեցի կըրթութեամբ, խտացնելու շարքերը նուիրական մեր ազգին»:
Խօսք առաւ Ճեմարանի պետական տնօրէն Տիար Ապտուլ Մաճիտ Մուհամմատ, որ ներկայացուց երկրիս վիճակուած ծանր պայմաններն ու կոչ ուղղեց վերանորոգ թափով ու հաւատքով նայիլ ապագային:
Ճեմարանի տնօրէն Տիար Յակոբ Քիլէճեան ներկայացուց ուսումնական տարեշրջանի զեկոյցը, շնորհակալութիւն յայտնեց Բերիոյ Հայոց Թեմի Առաջնորդին եւ Ազգ. Վարչութեան, որոնք նիւթապէս եւ բարոյապէս նեցուկ կանգնեցան Ճեմարանին, ինչպէս նաեւ Ճեմարանի խնամակալութեան, որ թեւ ու թիկունք կանգնեցաւ Ճեմարանին այս դժնդակ օրերուն ընթացքին:
Ան շեշտեց, թէ Ազգ.Քարէն Եփփէ Ճեմարանը հակառակ այս դժուար պայմաններուն մնաց հաւատարիմ իր սկզբունքներուն եւ առաքելութեան` պատրաստել ապագայի հայ երիտասարդը դիմագըրաւելու կեանքի դժուարութիւնները, կազմելու հայ ընտանիք, պահպանելու եւ զարգացնելու հայ մշակոյթը եւ հետապնդելու մեր արդար Հայ Դատը:
Ա.Ք.Ե.Ճեմարանը ամրոցն է հայութեան եւ հայկականութեան իր զուտ հայկական միջավայրով եւ հայեցի դաստիարակութեամբ: Ան փարոսն է, որ կը լուսաւորէ մեր երիտասարդութեան կեանքի ուղին:
Ապա աւելցուց «Ճեմարանը խստապահանջ է իր աշակերտներուն նկատմամբ, սակայն այս տարեշըրջանին նկատի ունենալով երկրիս ընդհանուր պայմանները, աշակերտներու եւ ծնողներու հոգեկան, ընկերային, ապահովական եւ տնտեսական պայմանները զիջեցանք զանազան կէտերու մէջ ի շահ աշակերտին: Ունեցանք աշակերտներ, որոնք ահ ու վախով ներկայացան դպրոց, գուրգուրացինք եւ զօրավիգ կանգնեցանք անոնց ներկայանալու դպրոց եւ կանոնաւորապէս հետեւելու դասաւանդութեանց, ունեցանք աշակերտներ, որոնք տունը ջերմանալու առիթ չունեցան վառելանիւթի չգոյութեան պատճառով, գրկեցինք զանոնք եւ մեծ զոհողութիւններով ապահովեցինք վառելանիւթը ջերմացնելու մեր զաւակները դպրոցէն ներս, երբ անգութ ձմրան պաղերը կը մխրճուէր մեր ոսկորներուն մէջ: Ունեցանք աշակերտներ, որոնք իրենց տունը կորսնցուցին, փորձեցինք օգտակար դառնալ եւ գտնել անոնց յարմար ապաստան մը: Ունեցանք աշակերտներ, որոնք դէժ շրջաններու մէջ կը բնակէին եւ դժուարութիւն կ՛ունենային դպրոց հասնելու, լայն հասկացողութիւն ցուցաբերեցինք անոնց ուշացումներուն եւ բացակայութիւններուն, իսկ մեր ծնողներու հիմնական դժուարութիւնը հանդիսացաւ, իրենց նիւթական պարտաւորութիւնները Ճեմարանի հանդէպ: Անշուշտ Ազգային վարչութիւնը չէր կրնար ձեռնածալ դիտողի դերակատարութեան մէջ ըլլալ, այլ նախաձեռնողի, տագնապողի եւ յարմարագոյն լուծումներ որոնելու լծուեցաւ, որ այս ծանր բեռը թեթեւցնէ մեր ծնողներուն վրայէն, եւ երբ յայտարարեցինք ծնողական ժողովին ընթացքին, թէ այս տարեշրջանին համար ունինք յատուկ կարգադրութիւն, որն է նիւթական պարտաւորութիւնները չպահանջել ծնողներէն, եւ ծնողները իրենց կարողութեան համաձայն կատարեն վճարումները, ծնողները ծափողջոյններով ընդունեցին որոշումը եւ բարձր գնահատեցին Ազգային վարչութեան այս քաջ, մարդկային եւ պատմական որոշումը. սակայն այս որոշումը իրականացնելու համար կը պահանջուէր շատ մեծ նիւթական եւ բարոյական զոհողութիւններ, որ այս տարեշրջանի համար Ազգ. Վարչութիւնը տարաւ վճռականօրէն:
Այնուհետեւ հանդիսութեան բեմավարուհի տիկ.Հուրի Տէրտէրեան-Տիլպէրեան ներկայացուց խնամակալութեան խօսքը: Ազգ. Քարէն Եփփէ Ճեմարանի խնամակալութիւնը ամէն տարի աւանդութիւն դարձուցած էր պարգեւատրել տարուան տիպար ուսուցիչը, սակայն այս դժնդակ տարուան մէջ համեմատական չափանիշներ չէր դրած, այլ բարձրօրէն կը գնահատէր բոլոր ուսուցիչ-ուսուցչուհիներն ու տնօրէնութիւնը եւ համայն պաշտօնէութիւնը անխտիր, որոնք քաջարի կեցուածք ցուցաբերեցին եւ ռումբերու ու զարկերու տակ առանց թերանալու կանգուն պահեցին Ճեմարանն ու յոյս ներշնչեցին աշակերտութեան:
Տեղի ունեցաւ 7-րդ, 8-րդ եւ 9-րդ կարգերու բարձրագոյն գումարներ ապահոված աշակերտներու պարգեւատրում:
Տեղի ունեցաւ վկայականաց բաշխումը, այնուհետեւ խօսք առաւ Բերիոյ Հայոց Թեմի Բարեջան Առաջնորդ Գերշ. Տ. Շահան Ս.Եպս. Սարգիսեան:
Գերշ. Սրբազան Հայրը ըսաւ` կրթական այս օճախը, լոյսի այս միջնաբերդը մենք հաւաքաբար կարողացանք բաց պահել շնորհիւ բոլոր անոնց, որոնք հաւատացին եւ այս դպրոցին համար չխնայեցին ոչ մէկ բան, որպէսզի Ճեմարանը ճառագայթող մնայ:
Ճեմարանը միայն շէնք ու կառոյց չէ շեշտեց Սրբազան Հայրը, այլ` ոգի է: Այդ ոգին ապրեցնողը մեր պատմութենէն յառնող հերոսներն են, եւ այդ ոգիին համար մեր նիւթաբարոյական բոլոր զոհողութիւնները քիչ են տակաւին: Այս ոգին է, որ մեզի հայ կը պահէ, այս ոգին է, որ մեզի մարդ կը պահէ, սուրիացի կը պահէ: Համեմատաբար ոեւէ սուրիացիի կամ կրթական հաստատութեան, Ճեմարանը մնաց աւելի տոկուն ու կայուն ու կրցաւ այս ոգին այս տարի եւս փոխանցել մեր սերունդներուն, առանց նահանջելու:
2012-13-ը լրումին հասցուցինք մեծ զոհողութիւններու գնով, ամէնէն վտանգաւոր կացութիւններու մէջ անգամ, Ճեմարանի կառոյցը թէեւ վտանգաւոր շըրջանի մէջ մնաց ու փակ պահեց իր դռները, սակայն մենք Ճեմարանի ոգիով շարունակեցինք մեր դասաւանդութիւնը մեր Ազգային Կիւլպէնկեան վարժարանէն եւ Վրացեան կեդրոնէն ներս:
Անդրադառնալով «Դպրոց» Հիմնադրամին Սրբազան Հայրը ողջունեց բոլոր բարերարները, որովհետեւ անոնք քաջ գիտեն, որ սուրիահայութիւնը Սփիւռքի ողնահարը կը ներկայացնէ ու թելադրեց մեր ծնողներուն միայն ակնկալիքներով չմօտենալ դժուարութիւններուն, այլ մեր կարելիութիւններով եւս նիւթապէս նեցուկ կանգնիլ մեր վարժարաններուն, որովհետեւ սուրիահայը վարժ է իր դժուարութիւնները յաղթահարելու իր ճիգերով, իր հնարաւորութիւններով եւ ոչ թէ միայն ակնկալիքներու վստահելով: Եւ Վերջապէս թելադրեց երկրի դըժուար պայմաններուն մէջ մեր կառոյցներուն, մեր եկեղեցիներուն, մեր ազգային կեանքին կառչած ու ամուր հաստատ մնալ:
Հանդիսութիւնը փակուեցաւ Սրբազան Հօր «Պահպանիչ» աղօթքով: