kantsasar.com – Սիրելի Նունէ Ասրեան
Այսու կը ցանկանք Համազգայինի Սուրիոյ Շրջ. Վարչութեան եւ անոր ողջ ընտանիքին անունով շնորհակալական մեր ջերմ եւ խորազգաց զգացումները յայտնել ձեզի, որ մարդկայնօրէն եւ թափանցելէ ետք միութեանս կողմէ տարուած ազգանուէր նուիրական աշխատանքի մանրամասնութիւններուն սրտառուչ յօդուածով մը արձագանգած էք ձեր ապրումները:
Արդարեւ ինչպէ՞ս չյուզուիլ եւ չզգաստանալ ի լուր այն խօսքերուն, որոնք կը շռայլուին կազմակերպութեան մը, որուն մէկ բաղկացուցիչ տարրը կը կազմէ իւրաքանչիւր հայորդի: Չէ՞ որ ինքն է եղած դարաւոր ճանապարհին մեր առաջնորդը, յոյսն ու ղեկավարը բազմաթիւ մարտակոչերուն:
Ինչպիսի՞ զգացումով մակարդուած է ձեր էութիւնը երբ ինքնավստահութեամբ կ՛աւելցընէք, որ հայը կա՜յ որովհետեւ ներկայ է պատրաստ Դաշնակցականը:
«Մենք կռուող ու մարտնչող մարդիկ ենք, զօրական եւ ի վերջոյ մարտիրոս, ապացուցելով որ մենք էլ ապրելու եւ յարատեւելու իրաւունք ունենք եւ այն ձեռք ենք բերել սեփական արիւնով:
Յաւերժ փա՜ռք յանուն հայութեան ու մեր նորօրեայ մեծ յաղթանակին համար նահատակուած հայորդիներին:
Դարասկիզբը նշանաւորուեց անկախութեան հռչակմամբ, որի սկիզբը դարձաւ 1918 թ. Մայիս 28-ի յաղթանակն ու Անկախ Հանրապետութեան ամրագրումը:
Հայ երիտասա՛րդ. դու արժանի շարունակո՛ղը պէտք է լինես Մայիս 28-ին սկիզբ դրուած գործին, հենց քո միջոցով հայը` հա՛յ պիտի մնայ աշխարհի որ անկիւնում էլ լինի, հայ ինքնութեան կրողն ու փոխանցողը դո՛ւ ես, դա՛ է քո հայի պատիւը, քո միջոցով մեր ազգային զարթօնքը պէտք է դառնայ կայացած իրողութիւն:
Հայը կա՛յ, պիտի ապրի, յաւերժանայ, քանի որ կայ հայոց բագինի առաջ զոհուելու պատրաստ Դաշնակցականը»:
Մենք եւս կը համալրենք հայրենասիրական ձեր միտքը, աւելցնելով` քանի որ հայը կը գոյատեւէ, կ՛ապրի Դաշնակցութիւնը:
Ուղարկած ձեր յօդուածը յանձնած ենք տպագրութեան, մեր մօտ լոյս տեսնող Բերիոյ Թեմի պաշտօնաթերթ «Գանձասար» շաբաթաթերթի խմբագրութեանը: Այս օրինակը յատկապէս կ՛ուղղենք ձեզի որպէս շնորհակալական զգացումի վսեմ արտայայտութիւն:
Առ այդ, կը մաղթենք ձեզի բարեկեցութիւն եւ յաջողութիւն ձեր առօրեայ աշխատանքներուն:
Յարգանօք եւ լաւագոյն զգացումներով`
Համազգայինի
Սուրիոյ Շրջ. Վարչութիւն