«Օգնիր եղբորդ» նախաձեռնությունը շարունակում է այդքան անհրաժեշտ օգնությունն ուղարկել Սիրիայի հայ համայնքին: Օրերս հերթական խմբաքանակն է հասել պատերազմական գործողությունների թատերաբեմ դարձած այդ երկիր:

Օգնությունն արդեն բաժանվել է ոչ միայն սիրիահայերին, այլեւ դրա կարիքը զգացող արաբ շատ ընտանիքների:

«Օգնիր եղբորդ» նախաձեռնության ծրագրով ուղարկված մարդասիրական օգնության հերթական ինքնաթիռը Երեւանյան ժամանակով երկուսին վայրէջք է կատարել Հալեպի օդանավակայանում: Մինչ այդ արդեն նախապես մշակված ուղերթի եւ պայմանավորվածությունների համաձայն, ինքնաթիռը Երեւանի ժամանակով 08:10-ին վայրեջք է կատարել Էրզրումի օդանավակայանում՝ անվտանգության նկատառումներով եւ ենթարկվել ստուգման:

Ստուգումը ընթացել է խիստ ռեժիմով եւ տեւել է մի քանի ժամ։ Թուրքական պատկան մարմինները փորձանմուշներ են վերցնում առաքված ապրանքներից։ Թուրքական լրատվամիջոցները շտապել են տեղեկություններ հրապարակել ինքնաթիռի վայրէջքի մասին, սակայն այս անգամ գրեթե բոլորը խուսափել են սենսացիոն տեղեկություններ հրապարակել, ինչպես պատահել էր նախորդ անգամ։ Նման միջադեպ տեղի էր ունեցել նաեւ հոկտեմբերի 15-ին առաջին՝ 15 տոննա կշռով ուղեբեռը Սիրիա ուղարկելու ժամանակ, սակայն ավելի ուշ պարզվել էր, որ իրականում ոչ թե հարկադիր, այլ պլանավորված, նախապես համաձայնեցված վայրէջք էր եղել: Ուղեբեռի զննությունից հետո հայկական ինքնաթիռը շարունակել էր ճանապարհը:

«Օգնիր եղբորդ» նախաձեռնության երկրորդ՝ մոտ 2 տոննա կշռող ուղեբեռն ուղարկվել էր Սիրիական ավիաուղիների միջոցով՝ շրջանցելով Թուրքիան: Այդ բեռը Հալեպ էր հասել Իրան-Իրաք օդային ճանապարհով: Ինչպես տեղեկացրեց նախաձեռնության համակարգող Խորհրդարանի Դաշնակցություն խմբակցության անդամ Վահան Հովհաննիսյանը, բեռնատար «Անտոնով ԱՆ 12» տիպի ինքնաթիռը Հալեպ է տեղափոխել ընդհանուր ծավալով 13 տոննա բեռ, որը բացառապես սնունդ է։ Հաշվի առնելով եղանակային պայմանները, օդի սառնությունը, այս անգամ հնարավոր է եղել առաքել նաեւ չոր կաթ եւ պանիր։

Հալեպում ուղեբեռի տնօրինումը կստանձնեն տեղի Կարմիր մահիկի միջազգային կազմակերպությունն ու Բերիո թեմի ազգային առաջնորդարանը, և համահամայնքային «Շտապ օգնության» հանձնախմբի կազմակերպմամբ կբաժանվի կարիքավոր ընտանիքներին։

ՀՅԴ Բյուրոյի անդամ, ԱԺ պատգամավոր Վահան Հովհաննիսյանը տեղեկացրեց, որ Սիրիա հումանիտար օգնություն ուղարկող «Օգնիր եղբորդ» նախաձեռնությունը հերթական նոր խմբաքանակը ուղարկելու ուղղությամբ բանակցություններ է վարում տարբեր ավիաընկերությունների հետ:

«Նոր խմբաքանակ վաղը չենք կարող ուղարկել, քանի որ այն գերատեսչությունները, որոնց հետ համագործակցում ենք, չեն աշխատում` կապված Բայրամի տոների հետ»,-հայտնեց Վահան Հովհաննիսյանը:

Անդրադառնալով Սիրիա ուղարկվող օգնության ավելացմանը` Հովհաննիսյանը հայտնեց, որ «Լիքվոր» դեղագործական ձեռնարկությունը 0,5 տոննա դեղորայք է տրամադրել: Շուտով դրամական փոխանցում կլինի նաև Զանգեզուրի պղնձամոլիբդենային կոմիբինատից: Ուրբաթ օրը պարենային օգնություն և տաք ծածկոցներ կտրամադրվեն նաև Հայաստանում հաստատված 100-ից ավելի սիրիահայ ընտանիքների: